Ծրագրերը

Նախաբան

Հայաստանը կանգնած է պատմական ընտրության առաջ։ Մեր առջև ծառացած մարտահրավերները միայն ռազմական, տնտեսական կամ քաղաքական չեն։ Դրանք առաջին հերթին արժեքային, կրթական և քաղաքակրթական խնդիրներ են։

Պետության ուժը սկսվում է ոչ թե կառավարությունից, այլ մարդուց՝ շարքային քաղաքացուց։ Եթե հասարակության մաս կազմող քաղաքացին չի ճանաչում ինքն իրեն, չունի ինքնության գիտակցություն, չի գիտակցում իր պատասխանատվությունը հասարակության և հայրենիքի առաջ, նա չի կարող ստեղծել ուժեղ հասարակություն և հզոր պետություն։

«Ինքնաճանաչում» շարժման նպատակը Հայաստանում նոր քաղաքական մշակույթի, նոր անհատական՝ վերլուծական մտածողություն ունեցող մարդու և պատասխանատու հասարակության ձևավորումն է։

Սա կուսակցություն չէ․ «Ինքնաճանաչում» շարժումը բաց է նաև կուսակցականների համար։ Շարժումն աշխատում է երեք ուղղությամբ․ • ազգային նպատակների համահայկական համաձայնության հարթակ, որտեղ այդ նպատակների շուրջ միանում են Սփյուռքի և Հայաստանի հայերը, • այս հարթակն առաջարկում է իր քաղաքական օրակարգն ու թեկնածուներին կամ աջակցում է այլ թեկնածուների համայնքային կամ համապետական ընտրություններում, • շարժումը հետապնդում է Հայկական Հարցի և մարդու իրավունքների արդարացի լուծումը միջազգային ատյաններում։

Շարժման սկզբունքները

• Ճշմարտությունը և արդարությունը քրիստոնեական արժեհամակարգի և հասարակական համերաշխության անկյունաքարն են, և դրանք չեն սակարկվում ոչ մի պարագայում։ • Պատասխանատվության ինստիտուտի առաջնայնությունը պետական կառավարման կարևորագույն բաղադրիչն է։ • Ազգային ինքնությունը ազգի, ժողովրդի իմունային համակարգն է, որի զարգացումը պետության առաջնային գործառույթներից մեկն է։ • Կրթությունը պետության հզորացման ու բարգավաճման առաջնային շարժիչ ուժն է։ • Գիտությունը բոլոր ոլորտները սնուցող կարևորագույն բաղադրիչն է։ • Մարդու ազատությունը և իրավունքների պաշտպանությունը պետության կայունության ու ժողովրդավարության անքակտելի հիմքերն են։ • Պետական մտածողությունը գալիս է փոխարինելու քաղաքական նախընտրությունները․ պետության շահն առաջնային է։

Մենք հավատում ենք, որ Հայաստանի վերածնունդը սկսվում է յուրաքանչյուր մարդու ներսում։ Ինքնաճանաչ մարդը ստեղծում է առողջ և կառուցողական հարաբերություններ իր միջավայրում, ընտանիքում։ Առողջ և համերաշխ միջավայրերն ու ընտանիքները ստեղծում են համերաշխ հասարակություն։ Համերաշխ հասարակությունը կառուցում է արդար և հզոր պետություն։

Մենք համոզված ենք, որ երկրի ապագան կախված չէ միայն իշխանությունից կամ ընդդիմությունից։ Այն կախված է յուրաքանչյուր քաղաքացու գիտակցությունից, ազնվությունից, աշխատասիրությունից և պատասխանատվության զգացումից։

Մենք կոչ ենք անում միավորվել ոչ թե անձերի, այլ արժեքների ու գաղափարների շուրջ։ Մեր նպատակն ամուր և սոցիալական պետականությունն է, որտեղ մարդը բարձրագույն արժեք է, նրա իրավունքներն ու ազատություններն առաջնային են։

Մենք ընտրում ենք․ • ճշմարտությունը՝ կեղծիքի փոխարեն, • ստեղծագործ աշխատանքը՝ անգործության փոխարեն, • պատասխանատվությունը՝ անտարբերության փոխարեն, • գիտելիքը՝ տգիտության փոխարեն, • համագործակցությունը՝ բաժանման փոխարեն, • պետական մտածողությունը՝ քաղաքական հարմարավետության փոխարեն։